غزہ میں صیہونی فوج کی فائرنگ سے مزید دو فلسطینی شہید

مہر خبررساں ایجنسی نے النشرہ کے حوالے سے نقل کیا ہے کہ غزہ میں بیت المقدس کو اسرائیل کا دارالحکومت تسلیم کرنے کے امریکی فیصلے کے خلاف مظاہروں کے دوران صیہونی فوج کی فائرنگ سے مزید دو فلسطینی شہید اور متعدد زخمی ہوگئے ہیں۔ فلسطینی وزارت صحت کے ترجمان کے مطابق غزہ کے مختلف علاقوں میں اسرائیلی سرحد کے قریب قابض صیہونی فوج نے احتجاج کرنے والے نہتے فلسطینیوں کو گولیوں کا نشانہ بنایا جس سے دو نوجوان شہید  جبکہ 10 زخمی ہوگئے۔غزہ کے علاوہ  مغربی کنارے کے تمام سات بڑے شہروں اور مشرقی بیت المقدس میں بھی اسرائیل اور امریکا مخالف مظاہروں میں کم از کم پانچ فلسطینی زخمی ہوگئے ہیں۔ واضح رہے کہ امریکی صدر کی جانب سے مقبوضہ بیت المقدس کو اسرائیل کا دارالحکومت قرار دیئے جانے کے بعد پورے عالم اسلام میں احتجاج کی لہر جاری ہے۔